爆笑進場，晚宴正式開始!!

換好衫後，譽宴的職員就帶我摸黑行去酒樓門口，準備match-in喇~~(感覺好似遲咗入戲院，有人帶位咁XD)
主人亦係門口stand by。

依家出面成300人係度，都咪話唔緊張呀~~~


音樂響起，MC上台

MC呢個重任，我無請出面的職業婚宴MC，而係搵咗呢位識咗十幾年的朋友擔當。
好多謝佢，一知我o地結婚，佢即刻舉手做MC，感動啊~~要知呢d三剎位，真係唔係人人肯做ga。


首先播放我們的成長片段。


呢段片，婚前一星期才拜託Videoman Tart幫手造的，真係臨急抱佛腳，sorry>.<
婚前3日完成，主人就即時拎咗去酒樓試碟，所以我係完全無睇過ga~~

可惜酒樓門口睇唔到電視，段片咩樣，我到播完都係唔知道呢v_v


播完片，就到我o地出場喇~~~

MC大叫：「有請孫XX和孫.................簡XX進場。」
呢吓蝦碌引起全場大笑。
其實都啱啦~~~wakakaka

酒樓仲準備咗吹泡泡機係後面助慶，攪到好dramatic咁，hahaha (呢個effect我事前唔知有ga~)

因為花球已經謝謝地，我又懶唔想拎住，將佢丟咗係reception張枱度=p

所以我好輕鬆呀，可以好似港姐咁揮住手進場 (咁啱音樂都係《香港小姐主題曲》)

仲擘大晒個口，大叫大笑，無晒儀態囉=.="


其實............我睇唔到d賓客ga

迎面戔spotlight，真係好"橙"眼=o=

因為見唔到人，心情變得好輕鬆，YOYOYOYO咁high住match-in

上到台，唔少得切假蛋糕


仲有世紀之吻

好彩大家無叫encore，多謝大家下手留情!!!!


跟住，無獎問答時間

估唔到MC問番我第一次見到主人，我同佢之間講咗d乜野=.="
haha，好彩我仲記得jar~~~~(不過唔係d咩sweet的對白，因為主人實在太口賤，令呢件事太刻骨銘心)

第一次見主人，係中一新生迎新日。
我去完toilet，行番座位時，遇到一位認識的朋友，原來咁啱大家編埋同一班。
又咁啱，呢位朋友的小學同學，就係主人。
第一次見，名都未記得，條友已經咀賤賤：「乜你原來去女廁ga!?」
(講番d background先，當時的我係男仔頭短髮的，加上瘦削的身材，真係無乜女人味ga~)
當時堅覺得呢條黑麻麻的肥仔好無禮貌!!!!
從此，我o地就做咗3年互串互窒的歡喜冤家。

我o地的愛情故事，MC當然有問啦，呢d場合，又點能夠唔坦白。
主人表白的一幕，我都仲記得，因為仍然貫徹佢咀賤的style。

有一晚大家傾電話，主人突然用好認真的語氣叫我個名。
當吓都feel到佢有d野想同我講，不過我真係骨都痺埋>~~<
我就叫主人，你都係平時咁叫番我啦~~~心諗，想嚇死我咩
主人再好認真咁同我講：「可唔可以做我女朋友?」
事出突然，我需要好好考慮一下，我就答：「明天覆你啦。」
於是明天小息時，我鼓起勇氣，走埋主人度，講咗句：「得喇。」
點知條友仔的回應係：「得咩呀!?」(手上仲拎住d小食)
o個吓真係有d嬲，乜原來你尋晚的認真係玩我ga!??
我怒睥咗主人一野，拋底句：「你自己諗吓啦!!」，轉身走>^<


台下的親朋戚友，聽我o地的愛情故事，聽到笑聲四起!!!
(我諗呢個就係大家所講的棟篤笑位)


問完我，就梗係要問番主人先fair啦~~~
MC問主人，佢之前講過，世界末日佢最想做咩??

哈哈，呢件事我都唔知呢~~~係其中一位姊妹報的料，好多好多年前佢地傾計時講的。

主人咁樣被人考一考，當堂打咗個突@0@
好彩佢都仲記得自己講過d乜野：「同Simple結婚」

今日你夢想成真啦~~~wakakaka


之後，就係一大段答謝的說話

多謝自己和對方的父母、屋企人、當日幫手的兄弟姊妹團、俾面出席的各方人仕。

講講吓，我同主人都忍唔住，眼紅紅T^T
主人仲成功攪喊咗我媽咪，但媽咪好眼利，昅到有人影佢，即刻避鏡頭>.<

當然唔少得多謝身邊呢個伴，今日無你我，邊成事^v^ (我仲唔小心爆料，講咗奶奶的壞話XD)




廢話講完，飲杯~~~~



起菜喇喂!!!




by笨豬小慧simple


相關閱讀：
出嫁的早上 - 女子組
出嫁的早上 - 男子組
玩新郎!!! (定玩兄弟呢??)
抱得美人歸
飲過女婿茶，靚過周秀娜
出門‧入門
飲過新抱茶，好快做嫲嫲
before the signature
感動的註冊
席前迎賓