安裝訂造傢俬

2011年8月28日(日)

今日紅櫻桃有師傅上嚟組裝尋日送嚟的傢俬。

師傅好準時，話10am真係10am嚟到新居。(攪到我地都陪佢地早起，我仲好眼瞓呀~~~)

一入屋就開工!!

攪到一地都係紙皮，不過係我叫師傅咁做嘅, 因為唔想刮花木地板。

今次有2個師傅一齊開工，賺咗。(上次朋友同我講得一個師傅安裝，攪咗12個鐘呀~~)

由10am攪到4pm，終於砌好晒d櫃了。

第一件完成的係書架連枱

初時以為無底板，點知係有(只怪我地傻吓傻吓咁無睇清楚張設計圖啦)，所以遮住咗d電制(剛剛好係櫃門後面)。師傅見狀，即時開電鋸cut窿，你都咪話唔堅!!!

 

第二件完成的係窗台櫃

呢個無難度啦~~

 

緊接完成係衣櫃

師傅都話我地醒，整個衣櫃放係窗台，慳番好多位ga~~只可惜窗台牆身唔係垂直，所以有少少漏光，呢d未來老爺會幫手執漏。

 

飾物架都超高速完成!!

度尺真係好準，fit晒呢個三角位，掂!!

 

吊櫃

呢個item有d麻煩，造得太淺放唔得d咩野，做得太深又怕唔穩陣會跌落嚟，而又好衰唔衰，呢個位的天花有一半係木板(假天花).....問咗度尺師傅的意見，佢話不如造深少少，可以打螺絲上天花，咁就安全d。

但最終吊櫃的深度係剛剛好到真假天花的接駁位，即係唔可以打螺絲上天花了.....

又好黑仔咁，裝好個吊櫃上牆之後，先發現有塊板裝錯咗，裝唔到門，要拆咗落嚟再裝過......

又裝又拆又裝，呢個吊櫃攪咗2個鐘先完成，主人都要落手落腳幫埋手。(因為得一條梯又無買櫈仔，高d的主人就做「托櫃天皇」，辛苦了)

其實應該仲有塊木板造個假橫樑遮醜，但塊木的成品唔長唔短，最後當然無裝到啦(浪費咗一塊木的錢......)

加上天花和牆身唔係完全垂直水平，裝咗個吊櫃之後有d空隙出現.......

所以又要拜託未來老爺幫手執漏了。

 

最後完成的鞋櫃

呢個櫃都裝咗好耐，尤其下面個6格鞋架，用就易但原來好難安裝ga，師傅要零空單手托住個架，另一隻手就上螺絲，成個架係實木，好重ga，真係力的表現。

 

組裝晒d櫃之後，就係成屋的紙皮、木碎、灰泥、螺絲釘等等......個戰場真係亂得好驚人(唔記得影底)，花咗2個鐘先收拾好殘局，散晒.......

櫃的品質、度尺、安裝都好好，只係個吊櫃有d唔滿意(關幅牆唔平的事，無計)，同埋有d後悔個鞋櫃揀咗深色而唔係白色，視覺上好怪咁，希望餐枱送到後感覺會和諧d啦。

 

by笨豬小慧simple