我做業主啦~~

今日是一個很值得紀念的日子，因為由今天開始，我完成了人生其中一個里程碑：做業主！

香港地少人多，政府又年年財赤，賣地俾地產商搵錢都唔會攞塊地起公屋居屋啦，所以新一代的年輕人，個個都以置業(私樓)為人生目標。

三年前開始，我和他就開始計劃買樓，首先當然是儲錢啦。儲咗兩年錢，剛好政府重售剩餘居屋，當然要去抽啦~~雖然都唔係好抵買，不過樓齡都算新，又係市區，咪試吓囉。點知結果都未公佈，金融海嘯就殺到，樓市股市齊齊大跌，但定好晒價的居屋竟然唔減價，咁搵笨，當然無買到啦。而且我們的儲蓄做晒股市大閘蟹，買樓計劃被迫割置。

又過多半年，美國日日傳出放水救國企的消息，海嘯的影響開始慢慢減退，但市場對金融產品已經無晒信心。不過，錢始終要搵，無得炒股咪改行炒樓囉，而且磚頭衰極都仲有舊磚渣手，點都好過股票會無端端變廢紙0既。於是，樓市竟然逆市升溫。加上美國罕有的零息時代，香港金管局泵水入市，銀行按息愈做愈低，我們想：係時候再諗買樓啦。

4月第一次睇樓，睇咗3次(每次都睇5間以上，好累)，終於搵到個0岩心水，點知都唔夠人爭，賣咗畀人；又試過俾d無良經紀玩，唉。終於到6月尾，已經對大行死心的我們，就膽粗粗咁去了一間細行，諗住試吓啦，就係咁認識了一位盡責又細心的好經紀，很快就幫我們找到合心水的樓盤，仲好快咁傾好咗，即日簽埋臨約。經紀知我們係初哥，又教我地點同銀行傾樓按，仲陪埋我地去，又介紹咗個好掂的律師行俾我地，等我地快手D攪好晒D手續，之後可以安安樂樂等收樓。

等咗2個半月，到了今天，收樓交吉啦~~~~

終於有個屬於我們的小天地，真係好開心呀<<喜極而泣

希望我們人生的下一個目標，可以快D完成就好了。嗯，兩年，應該得0既。