成都麗江婚照之旅 - Day 5

(主人終於交文喇~~~又可以出油雞囉，hoho，小慧負責remark。見粉紅字)

 

2011年4月10日(日)

今日我地要出發去香格里拉-普達措2D1N之旅。

又係晨咁早起身，然後又係o係番「皇冠假日酒店」的出口等阿拉丁o既車接我地過去佢地總店果面(總店在大水車，我地住的半步多客棧正正就在皇冠假日酒店的後門，兩個地方是南轅北轍的)。上車之後要再去南門要接多一對couple，佢地就係黎自廣州o既chris同阿玲啦(由於佢地廣東話同普通話都好，所以o係旅途上有時候成為我地o既翻譯 ^^)，坐多大約10min後就到阿拉丁總店了。

我地將兩大喼行李寄存係阿拉丁前枱，等我地11/4番去時拎番。等左一陣，我地o既領隊 - 小煒哥(佢好emphasis要叫佢領隊，唔係導遊，因為佢話佢地阿拉丁係純玩團，唔會導你去買野賺錢，只係幫一班志同道合o既人去佢地想去o既地方遊玩)，佢自己介紹係納西族同藏族o既mix，講野風趣幽默又生動，有佢就我地o既領隊真係超開心 ^^。同團中仲有一對香港夫婦，楊氏夫婦，咁o岩佢地仲要係住o係大埔tim ^^。除此之外，仲有一對小情侶；男的叫阿苗，來自溫州；女的叫超群，來自杭州，另外還有一對母女、一對老夫婦，今團人有12人；司機就是馬大哥，他也是納西族人。(個樣黑黑實實、面圓圓又眼大大，同主人好似樣，令同團人都笑主人其實係唔係同鄉呀)

先坐1hr車(沿路見到好多油菜花田和無晒樹枝樹葉的樹幹，而且一路上都有好多工程，所以程車都幾"登"同沙塵滾滾)，到了第一個景點「 長江第一彎」。可惜個日好大煙霞，我地實在唔係好感受到佢係一個彎囉。

走的時候，係側面睇先feel到dd佢係有轉彎嘅=.="

之後就車去了馬路邊一間食堂lunch，呢餐係我地o係成個trip入面最難食o既......原本諗住o係dee山邊野外，應該dee農家菜會唔錯的，但dee個諗法將我地完全失望(小慧無心機到連相都影唔多張)。

 

再坐多半小時車，就到第2個景點「虎跳峽」，呢度係長江上游最窄的地方，只有30m闊，唔係泰山都可以跳到過對面。

小煒哥話發現lee個奇景o既唔係當地人，反而係外國dee 旅行爬山者深入不毛發掘o家。由落車位置要行500多級樓梯先到最底部一睹長江上游最「萬馬奔騰」o既自然景色，真係十分狀觀呀~~~~不過落樓梯果陣就好期待好開心，好快快dee到底睇清楚一dee。但一到番上去o既時候呢~~~~~~~~好在果度海拔唔高，唔係都唔駛旨意番得切上去啦 >.<"

首先要行500幾級樓梯先落到去睇，d樓梯多到呢~~~望唔到盡頭。好佩服起出嚟個班工人，懸崖峭壁嚟ga，差錯腳死硬。

呢度就係最窄個度了，因為中間多咗舊大石「虎跳石」，相傳因為有隻老虎要跳過呢度，一腳伸咗舊大石落河做跳台，因而得名。

d河水真係好澎湃呀~~~水滾，沖得茶啦喂

係虎跳峽行咗個幾鐘(又曬又熱呀~~行樓梯行到腳仔軟，好彩呢度係低海跋jar)，就上番車，正式起程去香格里拉。

 

沿途o既景色都好靚呀，有梯田，有油菜花，仲有大草原！(一望無際，正!!)一路上真係好多好多牦牛呀、羊呀，小煒哥話香格里拉係牛羊豬馬都多過人的地方，初時覺得佢吹水，後尾你會發覺~~~~~~堅o家wor。

愈近香格里拉，就發現路上愈來愈多「白色小塔」，小煒哥話o既解釋我諗可以用「土地公公」黎認容應該差唔多。

 

坐咗2hrs車就到香格里拉，途中已經過了今天最高海跋3500m，好彩無咩bad feeling。

去到香格里拉，首先參觀「大佛寺」和「世界最大的轉經筒」，o係高高o既廟上望番落下個城鎮，別有一番風味，風景仲好靚tim。(原本想去松贊林寺ga，係當地一間規模頗大的藏廟，仲有小布達拉宮的美號，可惜去唔成，因為報團時阿拉丁話松贊林寺前面的地被人買咗，建了商業區，現在只有購物團會去，佢地做純玩團的唔會再去)

落車後明顯覺得比之前凍左dee，又係時候出動我地係古城買的頸巾。

個巨型轉經筒係要用人手拉動o家，金光閃閃，如果太陽照到正，反照出黎o既金光應該會令你不能正望。

發功!!!!!

我同小朱慧都有捐下香油錢，揸住香圍著廟內行一圈再上香(玩下啦，其實唔知行黎做咩o家 ^^)。小煒哥又同我地講下故事，原來每間藏廟都會有一位「活佛」主持，就係廟o既話事人。話說當「活佛」就過世o既時候，就會講低一dee預言，指示自己的徒弟去搵自己o既再世「小活佛」番黎，再慢慢培養佢成材。真係好似睇戲一樣wor。

之後就入城，行下「月光古城」啦，不過其實同大研古城差唔多，都係勁多新店、cafe呀咁，不過d建築再舊d(d窗仲要係梯型框，好有藏人特色)；不得不提o既係，果度係好興賣「寶劍」的 ^^，但冇可能拎到番香港，睇下就有份(因為藏人是合法帶刀的)。

「歷史堂」：小煒哥話香格里拉其實係因為有兩座城而命名的，就係「日光城」同「月光城」，意即香格里拉o既意思係日月光城，但日光城在文革時不幸被燒掉。只餘下月光古城了。

行下行下，到左一個廣場位置，見到有街邊串燒賣wor，初時團友們都係望下睇下，個心都係十五十六唔知試唔試好。我同小慧出名一見野食就咩都唔理(我地係會o係泰國街邊檔同當地人一齊買街邊沙冰果dee人黎o家 ^^)

先叫兩串牦牛肉，再黎一串粟米，味道好好呀，一d都唔貴 ^^(加埋唔洗RMB10!!!)

一大班團友見我地食得咁開心，又食完冇野異樣(我見鬼佬都有食)，即刻個個都勁買串燒，個個都仲食得多過地tim，連團中果dee aunti同uncle都食埋一份 。結果食左好一段時間，就再出發行去我地間酒店啦。

 

「鑄記酒店」係最近新開的酒店，準5星!! 報團前睇過相都好滿意，真身睇真係正呀~~

用上小數民族圖案設計，每間房又十分之大，照明系統十分充足(因為o係成都o既凱賓同埋麗江半步多都係好暗o家 >.<")，熱水差不多一開就有，沖涼一邊，坐廁一邊，係分隔開o家。仲有暖地系統，而最重要係......有部新淨電腦，連免費WiFi上網。

走廊都特別闊過人，d門同牆又係金色，好橙眼。中間地下就有個小花園。

坐係窗台，嘆吓碧螺春，真係好爽

 

是日晚餐就是酒店飯堂的牦牛火鍋啦。我地12位團友分2張桌食，每張桌只有6位團友，仲係一人一鍋形式，咩都唔駛爭，慢慢食，所以食得好舒服好開心(淨醬都有10小碟，仲有好多牛的部分同菜，好豐富呀~~~)。我地幾位後生團友就坐埋一枱，一邊食一邊分享下內地同香港o既野，又互相了解下對方o既背景，最後食到要小煒哥過黎催促一下我地tim ^^。

 

食完飯之後，我地自費去藏民家訪，感受一下藏民風情。

無限量供應穌油茶(味道似咸味的奶茶)、青粿酒(幾易入口，唔錯，主人飲咗好多)、芝士(好苦)、疑似蛋散的餅

女士們表演水袖舞，跳得幾嬌俏

男士就邊拉二胡邊單腳自轉，好高速ga~~~自轉10個圈!!

仲有藏族山歌聽，唔知係唔係個邊空氣真係太好，d人中氣好好，個咪遠到係個心口，都可以唱到爆晒咪，隻耳好wing，同埋真係唔係好聽得明佢地唱乜。

藏民家訪其實和想像中有D唔同，你去o既唔似係一個屋企，似係一個表演場地or祠堂，全部都係dancer同singer，大家圍著坐看中間的藏族歌舞。不過對未接觸過的我地嚟講，都係一個幾開心的體驗呀。

本身可以加錢order藏族傳統的烤羊，但小煒哥唔recommend，因為本地人係唔會殺小羊小牛o既，但當晚其他枱的人食嘅都係小羊，所以烤比你o既都係入口羊，咁你話值唔值比成千至千幾蚊去食啦!!!! 佢話錢應該玩o係值得o既地方，真係第一次join團比個領隊說服唔去消費 小煒哥，你係得嘅!!

 

探訪完之後，已經好累(可能今日真係太早起身)，連去古城行下的力都無，快快脆沖涼瞓覺。(有團友話夜晚訓唔到，個心跳得好勁，可能係受高海拔影響，不過對我地黎講，今晚係咁多日以黎訓得咁舒服o既~~~~~~可能因為我飲左都幾多酒下 haha)

 

p.s. 酒店內的花灑旁有塊板寫住：「貴客現正身處海跋3300m，為免引起高山反應，請勿用熱水沐浴過久，多謝合作，如有不適，請到外間休息及求助。」真係好攪笑的溫馨提示呀~~。但我日日食的紅景天係行氣活血o家喎，咁講法咪唔食好過食!?

 

團費 - RMB780/人(包車、包食、包住、包門票)
藏民家訪 - RMB85/人

阿拉丁旅游官網：http://lijiang.ly234.com/

 

by醒目主人simpson & 笨豬小慧simple