手忙腳亂迎龍年

(短袖衫都著緊喇，依家先blog到新年，OMG@-@)


2012年1月

今年的農曆新年嚟得特別早，1月中就到，剛剛先忙完聖誕節，氣都未唞夠，就話過年了。
而且今年係婚後第一個農曆新年，即係好多野都要自己預備，好緊張。
簡直係手忙腳亂呀~~~~


結咗婚，就要派利是。
所以，首要任務係預備利是。

幸好公司會幫員工唱新銀紙，我先唔洗排隊去銀行迫，yeah!
加埋奶奶和細妹提供的免費利是封(呢個好重要，慳好多ga)，利是任務超順利完成!! ^v^ v

雖然我o地唔算多親戚，但朋友就一大堆，而且大部分未 結 婚，所以預算的利是金額要$4000 (最後都超budget>.<)
咁大個女都未收過呢個金額的利是錢呀~~~
真係嫁咗先知，派利是原來可以好 金 @0@
希望班朋友快d結婚啦~~~~wakakaka~~~~


次要任務，當然係辦年貨啦。

海味冬菇就年年都會各自送俾對方的媽咪，幸好有相熟海味店，呢樣無難度攪掂。
至於買賀禮，真係好頭痕，因為我都唔知男家要唔要送(我屋企就要，但得3份，easy job啦，但老爺+奶奶的兄弟姊妹係1X人喎)
最後要打俾老爺指點迷津，幸好只係需要買少少je，嚇死。
辦年貨任務算有驚無險順利完成。


仲有，大掃除、買年花、貼暉春..................
大掃除嘛，懶+間屋入伙前已經勁抹一次(其實主要都係懶)，skip咗，無做，wakaka
買年花嘛，本來諗住等媽咪俾盤水仙我，但天氣太凍，等到年廿九都未開花，媽咪唔俾我拎走，我又唔想買貴花，又skip咗，唔做。
最後只有係咁易貼d暉春，裝飾吓間屋，有d新年氣氛囉。

暉春當然用我至愛的鬆弛熊啦~~~~~
可惜唔記得買blue tag，黐唔實，成日跌落嚟..........orz

年廿六開始兩邊屋企食團年飯，wooo，真係好忙。

媽咪今年落重本!!! 雞燉翅、蜜汁煎蠔、蒜蓉大蝦.......正!!! =q

今年的突破係..................我學識咗整蘿蔔糕喇!!! 年廿八仲班媽咪整咗3底蘿蔔糕tim，下年可以試吓自己係屋企整。(握拳)


忙忙忙到年廿九，終於有一刻的平靜，倆小口在家hea住迎接龍年。

得閒到跟傳統，食番碗湯圓，團圓團圓。



年初一又開始忙，忙住拜年。

第一年以新抱的身份見主人的親戚，雖然之前幾年我都有跟埋去拜年，但唔知點解，今年好緊張呀。
去到嫲嫲屋企，我淨係識得碌葛咁企埋一二邊=.=" (最好大家當我唔存在啦)
好彩叫主人拎定假，如果得我一個派利是，我死梗。(第一年派利是，主人no show!?，佢都死梗，我會殺咗佢!!)

下半場就返我娘家拜年，食餐飯咁，所以好早就可以回家sleep。緊張咗成朝，真係好累。

年初二，去朋友家拜年
食盤菜，今次買大家樂的，d野食多好多，仲有鮑魚tim~(記得有年訂美心盤菜，滾幾滾之後，d料溶晒!!!)
傾吓玩吓，仲丟底老公玩到凌晨3點才回家!! wakakaka


年初三，再去拜年。
今次輪到奶奶o個邊的親戚，而且得我單拖赴會。(無計，主人拎唔到假)
經過初一的經驗，今次我無咁緊張喇。而且今次係簡單食餐飯，一埋位就食野，心情都輕鬆d。
之後早走趕回家，因為有朋友上豬欄拜年。


年初五、六、七都有朋友來小小小豬爛拜年。
大家真係太客氣喇，個個都買禮物上嚟。其實你o地走晒之後，d野得我同主人食，根本食唔晒=.=" (真係食到依家先食晒jar)
下年大家帶個人嚟得ga la，唔好買野呀~~~~~




婚後的第一個新年，真係過得好開心。
真心感受到中國人的智慧，拜年雖然麻煩，但有個藉口成班人聚埋聯誼一下，熱熱鬧鬧咁，好開心咖!!

以前收利是會好開心，但漸漸長大，開始唔好意思收，到今年終於可以派番俾人喇~~~~
最估唔到係，原來嫁咗仲可以收利是

嘻嘻，收穫都唔錯。



by笨豬小慧simple