成都麗江婚照之旅 - Day 1

尋晚捱更抵夜咁，終於執好晒麗江7天婚照之旅的相了，真係要俾D掌聲自己(/^o^\)，可謂工程浩瀚呀~唔知發咗咩癲，竟然影咗1500張相=0="

今日開始我要慢慢blog番D「油雞」先。

2011年4月6日(三)

今天的行程如下：

04:30	起床
05:30	出門口
05:45	坐頭班火車去羅湖
06:15	到達羅湖 過關
06:45	坐K568中巴到深圳機場
07:30	到達深圳機場
08:30	登機
09:05	起飛
11:30	到達成都機場 品果專車接送去大本營
下午	試衫
晚上	錦里食食玩玩

可惜出現了小阻滯，行程有少少更改。

天都未光，人已在大埔墟火車站，返工都無咁早起身。

06:00順利到達羅湖火車站，但，點解仲未開閘嘅?? 有車到但唔俾過關住!!?? 乜咁玩我呀~~(之後先知道，原來頭2班去羅湖的火車係俾入境處等等在羅湖工作的人返工搭嘅，無check通關時間，真係失策)

所以搭深圳早機的朋友，唔洗晨咁早彈起身趕火車，早到都係要等到06:30才可以過關，或者係深圳訓一晚囉。

呆企到06:30，閘終於打開了，過埋關之後已經06:50了，怕趕唔切去機場，最後改搭的士了。

的士+公路費 - 約RMB140

07:20到達機場，on time，good!! 雖然國航好多人搭，但地勤counter亦好多，好快就辦妥登機證了。

深圳機場好細，我地見閘外無咩好行，就早D入閘算了，因為仲要排長龍攪安檢。

現在深圳機場和香港一樣唔俾帶水(開過同未開過都唔得，但空樽就OK)、打火機(寄倉都唔得，好多人唔知，寄存行李時check到，要好燶咁係條行李通道度摷番出嚟)、刀，記得唔好帶喇。

08:15左右入閘了，入到去都係無咩好行，好快已經行到去登機口，好彩成個機場都有WiFi，所以個個人都係度上網。

內航機果然好細架，希望降落時唔好太chok啦。(我真係搭過"過山車式降落"的國航呀，拋起咗2次，嚇死)

準時08:30登機，09:05起飛，YEAH!!

2個幾小時的空中之旅都有飛機餐食，而呢餐仲已經係咁多程飛機中最好食的一餐了，真係低處未算底呀~~

準時11:30到達成都機場，起飛前已經電聯了品果的慶芳，所以我地一出閘就見到來接我們的師傅了。(大陸叫司機做師傅，千萬唔好叫佢地司機，佢地會覺我你貶低佢ga，因為司機係拉豬車的)

(以下開始交俾主人繼續報告，豬小慧就做吓remark啦見粉紅字)

大約12:30左右到達品果成都店了。

品果門市o係一個非常繁華o既大街上(春熙路附近)，四週都係店舖及coffee shop。

首先品果o既慶芳帶我地去左 凱賓酒店 settle down

凱賓除左近同平之外，根本不值得推介，廁所比較差(沖涼位無浴缸又無圍板，沖完就成地濕晒)，好似冇燈一樣，但個房大到死咁(地毯梳化窗簾有d污濁，幸好床單枕頭乾淨)，夜晚仲有電話黎問你要不要按摩tim ^^，不過只住一晚是是但但啦，都未算唔住得人；佢同內地宜家好興果dee連鎖式大廈酒店係一樣o既。

成都凱賓酒店 - RMB168/晚

然後再快快去食個lunch。去左出名o既「龍抄手」，但我地好白痴咁上左2樓食小吃套餐，超貴(好似dee鬼老o係香港食高級中菜一樣)同埋唔好食；如果大家想試真係要o係地下果層好啦，仲要唔好太有期望。

龍抄手就係品果行番出大街，直行5分鐘就到。

2樓裝修好靚呀~~就係咁中招

我地叫了2個成都小吃套餐，一共上了20幾碟野，但有9成都唔好味。

呢杯茶叫「竹葉青」，好淡，無咩茶味，盛惠RMB5

龍抄手 - 共RMB148

食完去左揀衫，dee衫o既款式好多同埋好靚呀，我地揀左3個小時左右就完成啦。我地係包場式揀衫(因為我地去個日係長假期的試衫高峰期之後個日)，2個人serve我地2個人，你講你想要dee咩色款o既，佢地會車輪式不停拎比你試~~~~仲要即時就改好比你地~~~~~勁呀!!!

我地的禮服師 - 馬曉芳 & 冉光光

見天未黑就係春熙路行咗個圈，有條小街叫「錦華館」，古跡嚟ga，已經有差唔多100年歷史，D建築做咗YMCA同cafe，好靚呀~~好似入咗時光隧道咁。

之後夜晚去左一條叫做「錦里」o既步行街觀光同食野

的士去大約RMB13(打錶)

果度好靚呀，古色古香(當然唔夠麗江黎啦 >.<")。

搵食就去了一整小食街，我地由街頭食到街尾

其中夫妻肺片鍋魁，係小慧至愛，即係一個包夾住d夫婦肺片黎食，第一口唔太辣，但食多幾啖你就知死啦 >.<。(初時食都唔覺得有咩特別辣的feel，但食多幾啖已經嚟料，D麻辣攪到我個咀同條脷痺晒，食到成頭汗，頭都痕埋!!! 但又真係好好食又好刺激呀~~)而我就最like 燒鵪鶉，好似有少少煙燻之後燒好o既乳鴿一樣 ^^。(點埋四川香辣粉仲好味)

total應該唔洗RMB100

不得不提及o既係成都係一個不夜城咁，好夜都仲係成街都係人，有dee旺角feel。接我地機o既女師傅話成都人都係遲睡遲起，夜遊人特別多的~~~~~(上圖係錦里內的酒吧街，真係愈晚愈多人)

因為今日太早起身，真係好累，所以係錦里留到9pm左右就走人了。走的時候仲見有好多人剛剛到埗入城。

11:00做mask上床睡覺。第一天旅程完結了。

BY醒目主人simpson & 笨豬小慧simple

(仲有一件事要提下，就係品果有一位男職員，高高瘦瘦的，真係十分感謝佢。話說我地張電話卡入面得RMB44可用，就驚唔夠通話費，想去品果問下知唔知邊度有得充值，就係lee位男職員二話不說帶我地出去一間士多店，又幫手買又幫手充值埋，仲要最幫我地check埋仲有幾多通話費先比番我地，超唔好意思呀.......可惜第二日佢唔o係店內，唔能夠當面多謝佢>.<")