酒席試食兵團

呢一兩年身邊的朋友陸陸續續結婚，所以醒目主人和我都去過無數的婚禮，食過無數的酒席，簡直做咗試食兵團咁，所以到咗今日自己攪結婚，我地都唔洗再周圍參觀酒樓, 慳番唔少時間同腳骨力。

寫番個試食report吧！

 

漢寶皇宮
酒樓水準的食物，好夠鑊氣!!!裝修都係一般酒家的style，個人覺得有d娘，好彩樓底都夠高；長方形廳，所以坐最後排的賓客未必睇得清楚個台；由於係地庫，上落要用樓梯，對老人家同行動唔方便的賓客就麻煩少少。朋友結婚個日用唔晒個場，所以要同另一pair新人share(大家一前一後，不過唔同門口出入)，雖然用落地圍板間隔，不過唔傳聲，你d瘀野唔會俾人知道晒。bonus係，有龍堡酒店房送。

 

京都酒家(聯合廣場店)
酒樓水準的食物，無咩驚喜但一定食得人!!真係傳統個種酒樓style，backdrop係個對金色龍鳳，樓底一般高又未算矮；如果book唔晒個場，就用d有轆圍板隔住，跟住出面有人晚飯小菜。仲有，service麻麻。

 

聘珍樓
酒樓的style但酒店的價錢。迎賓位好靚，有條大走廊，可以加好多decoration(朋友整咗好多燈同埋羽毛裝飾)；不過L字形廳又多柱，會有死位啦~~~食物都好OK!!有好豐富的席前小食，唔怕餓親。

 

金域假日酒店
樓底好高有好多水晶燈好有氣派!!!!!食物未算好好味但又唔係難食0既。雀區同宴會廳係分開的，影相時就要麻煩兄弟姊妹幫幫手請人出現了。有酒店房送。

 

皇家太平洋酒店
食物好好味，service都好好。場地比較窄，樓底算矮，音響燈光都比較舊款；新娘房細又無獨立洗手間。有酒店房送。

 

沙田馬會會所
食物超級好味!!!甜品係buffet，幾特別ga~~新娘房很大，有獨立洗手間，仲有張大枱同梳化。扇形場地，有柱，所以都有死位；有個露台，可以做吸煙區，0岩晒多煙民朋友的新人。

 

德藝會
樓底超級高，應該有2層樓咁高，所以個舞台都好高(約1.2m)，坐到最後的賓客都睇得好清楚，最正係台上面有條樓梯，新娘會用升降台去到頂再行番落0黎，好有演唱會feel ga。食物就一般啦，未到難食但又未算好味。雀區同宴會廳係分開的，影相時就要麻煩兄弟姊妹幫幫手請人出現了。

 

海景嘉福酒店
樓底高有好多水晶燈好有氣派!!!!!場地四正無柱。新娘房就細咗d，但好彩有獨立洗手間。雀區同宴會廳係分開的(樓上一層)，影相時就要麻煩兄弟姊妹幫幫手請人出現了。雖然宴席的食物無酒樓個d咁好味，但席前小食就好好食，haha。有酒店房送。

 

映月樓
食物唔好食。樓底偏矮，L字形廳會有死位，最奇怪係，擺酒個廳係用側門出入，反而晚市個邊就用正門出入。

 

彩晶軒
場地好大，不過酒樓style的裝修，個人覺得有d娘。最勁係新娘房超級大，有獨立洗手間同埋偏廳，仲有oism按摩椅!!!企到累可以relax吓都唔錯。

 

大舞臺
古跡好有特色，不過唔打行燈真係好暗。食物一般般啦，未算好好味但又唔叫難食。新娘房有d簡陋，好彩有獨立洗手間。

 

 

嘩!!!唔寫都唔知，自己去咗咁多次飲宴，不過以上都無一間係我地好滿意想encore，所以最後揀咗始創彩福皇宴，好彩聽聞都好食，希望到時大家enjoy。

 

by笨豬小慧