[食譜] 法式焦糖燉蛋Creme Brulee

媽媽生日大食會特別泡製的甜品。
(相關閱讀：媽媽生日大食會)

真係好容易整，連我呢位甜品白痴都成功整到，HAHAHA
而且有得玩又有得食，大家都食得好開心呀~~

法式焦糖燉蛋Creme Brulee

材料：(6杯份量)
淡忌廉whipping cream -- 250mL
牛奶 -- 250mL
糖 -- 50g
雲呢嗱條 -- 1/3 條
蛋 -- 3隻

焦糖材料：
白砂糖 -- 適量

噴火槍
打邊爐用gas -- 1支

燉蛋做法：
1. 先打發蛋，再加糖打勻，至糖完全溶解和蛋漿轉淡黃色。
2. 牛奶、淡忌廉倒入煲中。
3. 雲呢嗱條打平切半，用刀的尖端取出籽，放入(2)中，剩下的雲呢嗱條也一併放入煲中。
4. 中火加熱奶，見煲邊出現泡泡便熄火。(不能煮沸，否則乳脂會被分離出來)
5. 將(1)逐少加入(4)，攪勻。(唔好一次過落晒，邊落邊攪拌，小心蛋漿熟晒。)
6. 過篩，均分倒入焗杯內。
7. 用小匙撇走泡沫。
8. 焗爐200˚C預熱。
9. 杯放焗盤內，焗盤注入1/3熱水，150˚C焗40分鐘。
10. 出爐後室溫放涼，放入雪櫃冷藏最少2小時。

脆皮焦糖做法：
1. 由雪櫃取出燉蛋，將1~2茶匙砂糖灑在冰凍的燉蛋上，用噴火槍燒成焦糖，凝固後就成為焦糖脆皮了。

貼士：

1. 焗好後的樣子，邊邊有D起泡，haha，老咗少少啦~~~應該焗到一半時，取出蓋上錫紙，就唔怕焗燶。
2. 第2次整，焗到最後10分鐘，改用100˚C焗，就沒有焗過頭面層老晒的現象了~~
3. (其他食譜教，未試過)如果沒有噴火槍，可改用焗爐整焦糖。方法：灑上1~2茶匙砂糖，230˚C入焗爐，放在最頂一格，焗至面層轉金黃色即可。

4. 加了焦糖的燉蛋再放入雪櫃，脆皮焦糖會變回水(溶掉了)，味道一樣OK，只是欠了脆脆的口感。
5. 三天內要吃光!!! 蛋和奶的食品很易變壞啊，不易久留。

BY笨豬小慧SIMPLE

[LC食譜] 焗芝士白汁什菜

呢個餸，係我讀書時期做「假日煮婦」時發明的，但當時屋企無焗爐，最多只能煮好白汁什菜後，最後加芝士，用餘溫令芝士溶掉=p

媽媽生日大食會特別呈獻呢個「焗爐版」^罒^v
(相關閱讀：媽媽生日大食會)

焗芝士白汁什菜

材料：(LC 18cm Round Oven)
金寶忌廉蘑菇湯 -- 1罐
水 -- 半罐
西蘭花 -- 1棵
甘筍 -- 1條
洋蔥 -- 1個
蒜 -- 2瓣
鹽 -- 1茶匙
黑椒碎 - 少許
片裝芝士 -- 2片

做法：
1. 全部蔬菜洗淨。西蘭花切走底部的硬莖，再切成小棵；甘筍去皮切成一口size；洋蔥去皮切成大件；蒜剁成蓉。
2. 煲半鑊水，將甘筍和西蘭花焯至8成熟，加鹽調味，撈起隔水備用。
3. LC煲下少許油，中火燒熱，爆香洋蔥，盛起備用。
4. 用回同一個煲，爆香蒜蓉，下忌廉湯和水，慢火煮至忌廉湯完全溶解，下黑椒碎調味。
5. 將(2)、(3)放回LC煲，翻炒一下，至全部蔬菜沾滿汁，熄火。
6. 焗爐250˚C預熱。
7. 芝士撕碎鋪面，毋需加蓋，放入焗爐200˚C焗10~15分鐘，至芝士溶了和轉金黃色，即成。

貼士：
1. 這道菜如果蔬菜煮得太冧就唔好味，所以掌握蔬菜煮熟的時間最重要，依次是洋蔥<西蘭花<甘筍，所以煮的時候要先煮最慢熟的甘筍，才能保持所有材料的最佳口感。
2. 可以配搭任何蔬菜，但以不容易出水的為佳，例如：燈籠椒、蘑菇、荷蘭豆、椰菜花....etc。



by笨豬小慧simple

百佳免費換Le Creuset !!!!

12月尾，突然係facebook見到呢張圖片，立即雙眼發光@0@

百佳易賞錢積分，可以用嚟換LC stoneware，呢次發達喇~~~~


閉喇閉喇，聖誕節前，用咗500分嚟換購OTO按摩頸枕，依家連最低要求的1000分都唔夠啊~~~T^T
仲要剩底的930分，2012年12月31日就到期!!!! @#@
咁即係迫我係31號前，要係百佳瘋狂shopping先得喇!!!

好彩，29號有friend嚟豬欄開party，我可以順勢買夠數，yeah~~


終於趕得切，31號用晒d分，換到LC喇~~~

仲要係我勁想要的粉紅色心心啊~~~hohoho，好好好開心呀~~~~




PS: 我發現黃埔間百佳有好多貨呀~~~想換的靚太識搵啦~



by笨豬小慧simple

[食譜] 牛尾什菜湯

媽媽生日大食會特別呈獻。(相關閱讀：媽媽生日大食會)

呢個湯真係好啱大食會，既易整，又包含大量蔬菜，唔怕個個做晒食肉獸啦~~~
而且煲起d牛尾勁冧勁入味，好好食呀~~
變成一湯二食了^^ 又可以慳功夫唔洗整多樣食物，wahahaha

牛尾什菜湯

材料 (4~6人份量)：
急凍牛尾 -- 1~1.5磅 (約$40)
椰菜 -- 1個
蕃茄(中) -- 3個
蕃茄(大) -- 1個
甘筍 -- 1條
水 -- 2湯碗
鹽 -- 2~3茶匙

做法：
1. 牛尾剪走部分肥膏，汆水過冷河，瀝乾水備用。
2. 蔬菜洗淨。椰菜切粗條；蕃茄去綠切成大件；甘筍去皮切成大件。
3. 全部材料放入大煲，加水至蓋過所有材料，大火煲滾，再放入真空煲燜2小時。
4. 取出後，先用大火煲滾，轉小火煲30分鐘，加鹽調味，即成。

貼士：
1. 中型蕃茄夠酸但不夠汁；大型蕃茄肉厚多汁但不夠酸，所以混合使用，各取長處又互補不足。
2. 如果沒有真空煲，水滾後，可改以小火煲1.5~2小時。



笨豬小慧simple

媽媽生日大食會

2012年10月27日(六)

是日媽媽生日正日，特意在豬欄攪了一個生日大食會啦~~~

大家又食又玩，個個都盡興而歸!!


叫得大食會，食物當然好豐富啦

有魚生、壽司、生蠔、牛扒、哈密瓜+Parma Ham
我仲大顯廚技，整咗 牛尾雜菜湯、焗芝士白汁雜菜、法式焦糖燉蛋

(食譜：牛尾什菜湯、焗芝士白汁什菜、法式焦糖燉蛋)

我特意整呢個creme brulee代替蛋糕，因為焦糖要自己整，有得玩又有得食

主人示範，用噴火鎗整焦糖

我仲準備咗個生日朱古力牌俾媽咪o個杯creme brulee
點知我太快手放入杯，原來個杯仲熱，塊朱古力牌溶晒喇=~=" (真係聰明一世，笨在一時)

大家嘻嘻哈哈就一晚，好開心媽咪好滿意呢個生日會的安排呢~~~
(尤其last的焦糖大戰，大家笑到癲咗)


媽咪，祝你
生日快樂!!! 年年有今日!! 歲歲有今朝!!

by笨豬小慧simple




P.S. 真係要讚讚，最近有好多食材公司，可以平靚正買到的生蠔、牛扒、凍肉等，買夠一個金額仲有送貨!!!
之前house party都order過唔少次，令我可以輕輕鬆鬆攪掂大食會^^

[食譜] 香草白酒焗三文魚

9 月LC開倉買的18cm rectangular dish之開光菜 =p

香草白酒焗三文魚

(Le Creuset 18cm Rectangular Dish)

材料：
三文魚扒 -- 一塊(約300g)
車厘茄 -- 5~8粒
白酒 -- 2湯匙

醃料：
橄欖油 -- 1/2 湯匙
鹽 -- 1/4 茶匙
黑椒碎 -- 1/8 茶匙
新鮮百里香 -- 1/2 湯匙
新鮮迷迭香 -- 1/2 湯匙

做法：
1. 三文魚洗淨抹乾，放在LC Dish內，下醃料醃5分鐘。
2. 焗爐250˚C預熱。

3. 車厘茄洗淨，混和少許鹽、橄欖油，放在LC Dish兩側的空位。
4. 淋上白酒，入焗爐以150˚C焗25分鐘即成。

貼士：
1. 如果買不到新鮮的百里香和迷迭香，可用1湯匙的意大利什錦香草乾代替。
2. 低溫慢焗，魚肉外脆內滑，yummy。
3. 我怕魚扒太厚唔夠熟，再用200˚C加焗5分鐘。

4. 長條形的三文魚扒原來很難找啊，最後在樓上搵到呢款急凍三文魚扒，價廉物美，無骨，去皮後就可烹調了。

by笨豬小慧simple

秋風起，梗係食大閘蟹啦!!

(2012年)今年大閘蟹豐收，D貨多到周街都有得賣(睇新聞先知，連深水埗某豆腐舖都有得賣=0=")
而且價錢勁平，羔又多，真係好難忍口呀~~~
(我勁LIKE大閘蟹=q)

樓下街市賣緊$20/隻，已經有半隻手掌咁大隻，平成咁，唔食對唔住自己啦~~
公毑價錢一樣，我o地買了2公2毑。
仲送埋紫蘇葉tim~~~魚檔的service實在太貼心喇~~~
其實仲有D大隻D，3.5吋直徑size只是$60隻，真係一人一隻當飯食都得!!!
但我第一次整，唔敢買咁大隻，都係買D細隻try吓先啦~~

做法：
1. 紫蘇葉浸軟，洗走泥沙，揸乾水備用。
2. 大閘蟹不用解開水草，用牙刷刷乾淨蟹身。
3. 大片的紫蘇葉放在碟上，蟹(連水草)再放上面，肚向上(咁熟咗D羔就會黐實蟹蓋)，每隻蟹上再放一小片紫蘇葉。
4. 隔水蒸20~30分鐘。
5. 蒸熟後，倒走碟內的水，剪走水草，上碟!!
6. 輔以食蟹轉用剪刀和長挖，方便拆蟹和食用^v^

貼士：
1. 紫蘇葉有解毒驅寒作用，而大閘蟹是寒涼濕毒，兩者互相抵消。
2. 食完蟹切勿再吃柿，會胃氣脹痛ga>^<

咪睇佢細細隻，揭開蟹蓋，D羔多到baba聲!!!
香甜的蟹羔，齒甲留香，真係食得好開心啊~~~HOHOHOHO

主人衰到食晒d羔同個蟹身之後，就唔拆d蟹腳食，佢話咁平，再買再食過=.="，但我覺得有d浪費食物囉.........


食完大閘蟹之後，再飲番杯黑糖薑母茶，驅一驅寒，成件事就完滿晒^口^

材料：
黑糖薑母茶磚 -- 1塊
片糖 -- 半塊
紫蘇葉 -- 1~2塊
水 -- 500mL

做法：
1. 小煲下500mL水、紫蘇葉，煲滾。
2. 下黑糖薑母茶磚、片糖，轉小火，不斷攪拌至糖全部煮溶。
3. 熄火，浸至食完蟹後食用。

貼士：

1. 黑糖薑母茶是主人的台灣手信，佢買呢款太辣，所以加片糖中和番辣味。
2. 薑茶一定要熱飲才有驅寒作用!!



BY笨豬小慧SIMPLE

[食譜] 薑蔥炒蟹

買咗新的不鏽鋼鑊，可以炒海鮮喇~~~YEAH!!! (相關閱讀：不鏽鋼鑊)
中秋後，蟹就最肥美多羔，一於整炒蟹來開鑊!!!!!

第一次煮就成功，真係好美味呀~~~~
只是我被蟹拑夾了一下T^T受傷了，好痛Y_Y
而且新買的不鏽鋼鑊，第一次用就燒黑了，HAHAHAHA，果然五層鑊比較好=P

薑蔥炒蟹

材料：(2人份量)
花蟹 -- 2隻 (約共12両重)
薑 -- 5大片 (切絲)
蔥 -- 2棵 (切段)
紹興酒 -- 1湯匙
水 -- 半碗

汁料：
蠔油 -- 1湯匙
生抽 -- 1湯匙
糖 -- 1茶匙

做法：
1. 筷子由口插入蟹身，kill it >~~<
2. 洗淨蟹，輕輕刷刷殼。
3. 劏蟹：扭斷蟹拑，用刀背扑裂硬殼，方便入味和食用；去走腹部的奄，沖走排泄物；揭起蟹蓋，沖淨；去腮去腸，蟹身一開四，沾上少許生粉。
4. 燒熱大量油，下薑和白色的蔥起鑊，先爆蟹蓋，後加入蟹身，最後落蟹拑，中大火半煎炸地炒，小心蟹羔跌出。
3. 贊酒，加水和汁料，加蓋焗3分鐘至蟹熟。
5. 加入餘下的蔥，炒至收汁，即成。

貼士：
1. 我家中沒有紹興酒，改用了花雕，一樣美味啊~~
2. 死蟹肉質會變水，所以要買游水的。
3. 如果唔識kill蟹，也可以叫魚檔幫手劏，但回家要立即煮。



BY笨豬小慧SIMPLE

[食譜] 川貝薄荷葉蜜糖燉雪梨

秋冬時節天氣乾燥，口乾舌燥，多痰又有幾聲咳，係時候要補一補，潤一潤。

川貝，止咳化痰，清熱散結；雪梨，生津止渴，清熱潤肺；
川貝燉雪梨滋潤化燥，寧肺止咳，最啱感冒唔清，久咳唔斷尾。
加埋通鼻塞一流的薄荷葉，食完又潤又爽，吸啖氣都通順d!!

川貝薄荷葉蜜糖燉雪梨
材料：(1人份)雪梨 -- 1個
川貝粉 -- 1茶匙
蜜糖 -- 1~2茶匙
開水 -- 1茶匙
薄荷葉乾 - 1茶匙

做法：1. 雪梨洗淨，於近莖部的1/5位置切開，當蓋子備用。
2. 用鐵湯匙挖去芯，將雪梨造成杯形。
3. 薄荷葉用少許水浸泡一下，洗去污糟嘢，揸乾水備用。
4. 雪梨杯放入川貝粉和水，攪勻後加入蜜糖，最後放薄荷葉。
4. 雪梨蓋上(1)，用數支牙籤固定，小心移放在飯碗裡。
5. 將(4)放進大煲，加水到飯碗一半的高度，水滾後以慢火燉2小時即成。

貼士：1. 寒咳人士不宜服用。(即指逢晚上就咳、痰為透明色的人)
2. 此饌專治肺燥痰多，感冒咳嗽久醫無效的人，吃後痰易咳出，痰量減少，多吃2~3劑就可完全清痰喇~
3. 川貝味帶苦，不喜歡苦味的人，可以多加些少蜜糖，但切勿太多，甜食易惹痰。
4. 可用冰糖6g(大約手指公指頭的size)代替蜜糖。
5. 先墊廚紙/蒸架在大煲底，可防止飯碗在煲內翻倒。
6. 川貝在中藥房有售，可買原粒，叫藥房幫忙磨成粉，或者直接買粉狀的。薄荷葉乾也可在中藥房買到。
7. 小心留意煲乾水，每隔30分鐘查看一下，如乾水請加熱水進大煲。


by笨豬小慧simple